Alþjóðleg samkeppni

Forvali fyrir samkeppni um þróunaráætlun fyrir svæðið umhverfis Keflavíkurflugvöll fram til ársins 2050 var hleypt af stað í maí 2021 á útboðsvef Evrópska efnahagssvæðisins. Mikill áhugi var á samkeppnisútboðinu og alls bárust umsóknir um þátttöku frá 25 alþjóðlegum teymum. Þrjú teymi, leidd af Arup, Jacobs og KCAP, komust áfram í lokaáfanga samkeppninnar og voru valin til að skila mótuðum tillögum byggðum á efnahagslegri greiningu. Í desember 2021 var tilkynnt um niðurstöður samkeppnisútboðsins en það var alþjóðlega hönnunar- og skipulagsstofan KCAP sem varð hlutskörpust. Tillaga KCAP þótti heilt yfir mjög vel útfærð og setja fram skýra sýn fyrir þróunaráætlun.

Í heild hefur Kadeco umsjón með 55 ferkílómetra svæði við Keflavíkurflugvöll. Í samkeppninni var lögð áhersla á ákjósanleg þróunarsvæði sem meðal annars styrkja tengingarnar á milli flugvallarins og Helguvíkurhafnar, sveitarfélaganna á svæðinu við flugvöllinn og höfuðborgarsvæðið.

Rík áhersla er lögð á að svæðið þróist í takt við samfélagið og að við uppbyggingu verði horft til styrkleika Suðurnesja og Íslands. Markmiðið er að fá fram heildstæða þróunaráætlun sem leggur grunn að þróunarkjarna fyrir atvinnulíf og samfélag á Suðurnesjum og dregur fram markaðslega sérstöðu svæðisins.

Þær þrjár tillögur sem komust í úrslit samkeppninnar þóttu allar mjög góðar. Þær áttu það sameiginlegt að koma með góðar hugmyndir um hvernig flugvöllurinn getur verið efldur sem efnahagslegur drifkraftur fyrir svæðið með ríka áherslu á umhverfis- og samfélagslega þætti. Í tillögunum kemur fram mikið af áhugaverðum hugmyndum sem Kadeco hefur rétt á að nýta í framhaldinu.


Vinningstillaga KCAP, íslenskur samstarfsaðili er VSÓ.

Tillagan þykir yfir höfuð mjög vel útfærð, hún nær umfangi og skala þróunarsvæðisins vel og sýn fyrir þróunaráætlun er skýr. Tillagan þykir raunsæ en jafnframt mjög spennandi. Gott jafnvægi er á milli uppbyggingar við flugstöð og á öðrum stöðum eins og Ásbrú og Aðalgötu. Einnig er lögð áhersla á að tengja kjarna svæðisins saman með með grænum svæðum þar sem virkir ferðamátar eru í forgrunni. Mikil áhersla er lögð á samvinnu við lykil hagaðila og samfélagið. Samgönguhluti tillögunnar er vel útfærður, en tillagan gerir ráð fyrir sérstakri forgangsbraut fyrir hraðar og vistvænar almenningssamgöngur milli Keflavíkurflugvallar og höfuðborgarsvæðisins. Þetta býður upp á góða möguleika til að bæta samgöngur á milli Reykjaness og Reykjavíkur og tengir vel við bæði áætlanir um Borgarlínu sem og nærsamfélagið.

Tillaga KCAP (PDF)


Tillaga Arup, íslenskir samstarfsaðilar eru Yrki arkitektar, Environice, Vatnaskil, KPMG, Mannvit og Athygli.

Tillagan er vel fram sett og vinnur út frá framtíðarsýn um hvernig flugvöllurinn getur styrkst  enn frekar sem efnahagslegur drifkraftur. Tækifæri sem nefnd eru til frekari uppbyggingar eru Helguvík Eco-Industrial Park með áherslu á grænan iðnað, uppbygging í kringum aðkomu að flugvellinum með áherslu á vandaða og nútímalega hönnun sem tæki tillit til umhverfis svæðisins, áhersla á þróun í fraktflutningum og Ásbrú Eco-Industrial Park með áherslu á gagnaver. Einnig eru dregin fram fjölbreytt tækifæri sem miða öll að kolefnisjöfnun, til að mynda að Keflavíkurflugvöllur verði leiðandi í innleiðingu á endurnýjanlegum orkugjöfum fyrir flugiðnaðinn og flughöfnina og að svæðið verði leiðandi í innleiðingu nýrra ferða- og flutningsmáta sem knúnir eru áfram af rafmagni.

Tillaga Arup (PDF)


Tillaga Jacobs, íslenskur samstarfsaðili er VSB.

Tillagan leggur fram skýra sýn fyrir þróunaráætlunina og sýnir almennt að höfundar hafa góða tilfinningu fyrir svæðinu. Gott og skýrt jafnvægi er á milli efnahagslegra-, samfélagslegra- og umhverfislegra þátta. Efnahagsleg tækifæri sem sett eru fram í tillögunni eru vel útfærð, en þau eru Reykjanes Torg, uppbygging  nálægt flugvellinum, og Global TradePort , verkefni með áherslu á að tengja saman Diamond Gate og Helguvíkurhöfn og styrkja svæðið sem flutningamiðstöð. Samgöngutillaga og módel fyrir umhverfismat eru vel útskýrð. Tillagan sýnir mjög góðan skilning á staðbundnu umhverfi og náttúru og setur fram skýrar hugmyndir um hvernig hægt væri að nota það við mörkun svæðisins og í hönnun. Hugmyndir fyrir erlendar fjárfestingar eru einnig góðar, sérstaklega þótti frumleg hugmynd um framleiðslu gervidemanta.

Tillaga Jacobs (PDF)

Samkeppnisgögn

Hér að neðan er að finna gögn sem Alta ráðgjöf og Kadeco tóku saman fyrir þátttakendur í samkeppninni. Í þeim er greinargóð útskýring á forsendum verkefnisins og greining á innlendu og alþjóðlegu samhengi.

Forsendugreining fyrir stefnumótun (PDF)
No items found.
No items found.

Ertu með spurningar?