Ásbrú er nýr bæjarhluti í Reykjanesbæ, sem byggist upp á fyrrum varnarsvæði bandaríska hersins við Keflavíkurflugvöll. Reykjanesbær hefur ákveðið að Ásbrú verði næsta uppbyggingarhverfi í sveitarfélaginu, en þar er nú þegar fjölbreytt samfélag sem mun styrkjast enn frekar með uppbyggingu nýrra íbúða og innviða. Svæðið hefur mikla möguleika hvað varðar þéttingu byggðar og endurnýjun. Gert er ráð fyrir því að á Ásbrú geti risið allt að 14.000 íbúa hverfi á næstu 30 árum.

Þróunaráætlun K64 byggir á núverandi þéttbýlisskipulagi Ásbrúar með stærri og þéttari íbúðabyggð með sérhæfðum atvinnusvæðum á jaðrinum en nærþjónustu í miðjunni. Uppbygging mun eiga sér stað í áföngum og svæðin á Ásbrú, bæði íbúðarsvæði og atvinnusvæði, skilgreind með mismunandi nálgun í hönnun, skipulagi og áherslum eftir því sem við á. Markmiðið er að byggja upp ákveðna byggðaklasa á Ásbrú þar sem þéttleiki er meiri, samgöngutengingar góðar og finna má fjölbreytta þjónustu og atvinnutækifæri.

Sjá einnig ÁSBRÚ Rammaskipulag (PDF).