Tæknivellir eru athafnasvæði á Ásbrú í Reykjanesbæ, skilgreint fyrir léttan iðnað. Staðsetningin er afar hagkvæm og ákjósanleg, í aðeins nokkurra mínútna fjarlægð frá Keflavíkurflugvelli og vel tengd við helstu samgönguæðar og þar eru allir nauðsynlegir innviðir til staðar.
Svæðið hentar fyrirtækjum af fjölbreyttum stærðum, hvort sem um ræðir minni framleiðslueiningar eða starfsemi sem þarf rými til vaxtar, en í boði eru lóðir frá 4.000–20.000 fermetrum að stærð á samtals 264 hekturum af byggjanlegu landi.
Athafnasvæði Tæknivalla er tilvalið fyrir létta framleiðslu, hátækni framleiðslu, líftækni- og matvælavinnslu, starfsemi tengda vöruflutningum, tæknivædda starfsemi og gagnatengda starfsemi. Kostir svæðisins styðja við stöðugleika í daglegum rekstri og bjóða upp á rými fyrir langtímavöxt.
Lesa má meira um þróunaráætlun Keflavíkurflugvallarsvæðis, K64, hér.
Um er að ræða leigulóðir í eigu Ríkissjóðs Íslands sem leigðar eru til 50 ára. Ársleiga lóða er 2% af fasteignamati lóðar fyrir atvinnuhúsnæði en þó að lágmarki 142,6 kr. pr. fermetra samkvæmt byggingarvísitölu frá janúar 2026. Fyrir íbúðarhúsnæði er ársleiga 1,5 % af fasteignamati lóðar. Að öðru leyti gildir gjaldskrá Reykjanesbæjar.
Samræmdar reglur gilda um heimildir Kadeco til að gera samkomulag um forleigurétt við leigutaka lóða á starfssvæði Kadeco, annars vegar í lóðarleigusamningum og hins vegar í sérstöku samkomulagi vegna aðliggjandi lóða. Lesa má nánar um verklagsreglur um forleigurétt hér.
