Í fyrra fengu Kadeco og Reykjanesbær krakkana í Háaleitisskóla með í vinnustofur um það hvað hægt væri að gera til að bæta umhverfið á Ásbrú, en hönnunarteymið ÞYKJÓ hafði umsjón með vinnustofunum. Vinnustofurnar voru vel heppnaðar og voru valdar Verk ársins á Hönnunarverðlaunum Íslands í fyrra. Það sem var skemmtilegast við verkefnið var að sjá hvað börnin voru áhugasöm og spennt fyrir því að geta haft raunveruleg og uppbyggileg áhrif á umhverfi sitt.

Í dag var Barna- og ungmennahátíð Reykjanesbæjar, BAUN, sett og af því tilefni var ný aparóla formlega tekin í notkun við leiksvæðið við Skógarbraut. Aparólan, sem var sett upp af Reykjanesbæ með dyggum stuðningi Verne Global, er einmitt ein þeirra hugmynda sem börnin í skólanum settu fram á vinnustofunum í fyrra.

Krakkarnir voru himinlifandi með róluna, en fulltrúar frá Reykjanesbæ, Háaleitisskóla og Verne Global voru viðstaddir opnunarathöfnina.

Nánar má lesa um vinnustofurnar hér, hér og hér.

‍